Манай цахим хуудасны эрхэм хүндэт зочид та бүхэндээ болон зоонозын өвчин судлалын үндэсний төв, аймаг, нийслэлийн төвүүдийн нийт хамт олондоо энэ өдрийн мэндийг дэвшүүлье
Байгалийн голомтот, зоонозын өвчнийг тандах, хянах, эрт сэрэмжлүүлэх, хариу арга хэмжээг судалгаа, нотолгоонд тулгуурлан хэрэгжүүлж, өвчний эрсдэлийг багасган, хүний өвчлөл, эндэгдлийг бууруулах үйл ажиллагааг мэргэжлийн өндөр түвшинд гүйцэтгэн, зохион байгуулах нь бидний эрхэм зорилго билээ. Энэхүү зорилгын төлөө сэтгэл зүрхээ зориулан энэ биеэ үл огоорон, эр зориг, эрдэм мэдлэгээ дайчлан ажиллаж ирсэн үе үеийн ахмадууд болон өнөөгийн үеийнхэн бол бидний бахархал юм. Бидний ололт амжилт бүрийн ард, бидэнтэй цаг ямагт хамт байж хамтран ажиллаж ирсэн байгууллага хамт олон, нийт иргэд та бүхний дэмжлэг байдгийг бид сайн ойлгодог.
Шинэ болон шинээр сэргэж буй халдваруудын гаралт, давтамж сүүлийн жилүүдэд нэмэгдэж нийгмийн эрүүл мэндийн ноцтой асуудлын хэмжээнд хүрч дэлхий дахиныг түгшээж байгаа нь биднээс илүү хариуцлага, мэдлэг, сонор сэрэмж, хамтын ажиллагааг шаардаж байна. Иймээс бид үйл ажиллагаандаа “Нэг эрүүл мэнд” үзэл баримтлалыг хэрэгжүүлж салбар хоорондын хамтын ажиллагааг өргөжүүлэх, төр захиргаа, нутгийн удирдлагын болон хамтран ажилладаг бүх байгууллагууд, нийт иргэдийн дэмжлэгийг авч ажиллахыг зорьж байна.
Биднийг дэмжиж хамтран ажиллаж буй танд гүнээ талархаж буйгаа илэрхийлэхийн ялдамд бидний цаашдын олон талт хамтын ажиллагаа тасралтгүй цэцэглэн хөгжих болно гэдэгт итгэлтэй байна. Та бүхэнд ажлын амжилт, сайн сайхан бүхнийг хүсэн ерөөе.
Хүндэтгэсэн
Н.Цогбадрах
