Судлаачид жимсний ялааны гашуун амтыг мэдрэхтэй холбоотой генийг өөрчилснөөр тэд кокаиныг сахарозоос илүүд үзэн хэрэглэх болсоныг тогтоожээ. Энэхүү судалгаа нь донтолтын генетик механизмыг ойлгоход шинэ боломж нээж байна.

АНУ-ын Ютагийн Их Сургуулийн эрдэмтдийн хийсэн судалгаагаар жимсний ялаа кокаиныг байгалийн жамаар гашуун бодис гэж мэдэрдэг тул түүнээс зайлсхийдэг аж. Харин гашуун амтыг мэдрэх Gr66a рецептортой холбоотой генийг мутацид оруулахад ялаанууд кокаин агуулсан уусмалыг илүүд үзэх хандлагатай болсон байна.

Судалгааны явцад ялаанууд кокаиныг эхлээд хөлөөрөө мэдэрч, улмаар хэрэглэхээс татгалздаг болохыг тогтоожээ. Гэвч энэхүү мэдрэхүйн механизмыг генетикийн аргаар өөрчлөхөд кокаинд дургүйцэх хандлага буурч, мансууруулах бодисыг сонгон хэрэглэх болсон байна.

Судлаачдын үзэж байгаагаар генетикийн хувьд өөрчлөгдсөн жимсний ялаа нь кокаины хэрэглээний эмгэг болон донтолтын үндэс болсон генетикийн хүчин зүйлсийг судлах үр дүнтэй загвар болж чадсан. Энэхүү судалгааны үр дүн нь ирээдүйд хүний донтолттой холбоотой генүүдийг илүү нарийвчлан судлахад хувь нэмэр оруулах боломжтой юм.

 Эх сурвалж: https://www.the-scientist.com/a-mutated-taste-gene-makes-fruit-flies-seek-out-cocaine-73069

Нийтэлсэн огноо: 2026.06.26